AGPI - Asociación Galega de Profesionais da Ilustración

Salamántiga
Manuel Uhía

Buscador de Ilustradores

Listado de ilustradores

Noticias

Marina Seoane, entrevistada na TVG
con motivo do ‘Caderno AGPI 2015’

27/05/2015

A presidenta da Asociación Galega de Profesionais da Ilustración, Marina Seoane, foi entrevistada na edición de onte do programa Zigzag Diario, da TVG2, con motivo da edición do Caderno AGPI 2015, que nestas datas está a ser distribuído por empresas dos sectores editorial, audiovisual e da comunicación de Galicia e o resto do Estado. A entrevista pode verse agora en liña, a través deste enlace (transcorre entre os minutos 15 e 21).

Nova sección sobre ilustración en
‘La Voz de Galicia’

22/05/2015

O suplemento semanal Fugas, do xornal La Voz de Galicia, presenta hoxe unha nova sección, titulada «Ilustrando en Galicia», a cargo do noso socio David Pintor.

A estrea da sección é unha entrevista ao noso tamén socio Óscar Villán: «Disfruto ante el papel en blanco».

Entrevista a Jacobo Fernández en ‘Biosbardia’

13/02/2015

A revista dixital sobre literatura Biosbardia publicou esta semana unha ampla entrevista ao noso socio Jacobo Fernández Serrano. Baixo o título «O tempo verbal das miñas obras é o pretérito xogativo», a entrevista fai un percorrido polas inquedanzas creativas de Jacobo como ilustrador, autor de BD e escritor.

‘El País’ dedícalle unha páxina a David Rubín

25/08/2014

O diario El País dedicou un artigo dunha páxina o pasado sábado ao noso socio David Rubín. Baixo o título «El gran sueño americano de David Rubín», a xornalista Tereixa Constenla repasa brevemente nel a súa traxectoria, e fai destaque das súas próximas publicacións no mercado estadounidense; nomeadamente, The Rise of Aurora West, pero tamén as edicións americanas de El héroe (en Dark Horse) e Beowulf (en Image).

Hai tamén lugar para falar das súas próximas obras no mercado español: a obra colectiva para o proxecto Viñetas de Vida de Oxfam Intermón, e mais a novela gráfica Gran Hotel Abismo, que prepara con Marcos Prior.

Luis Sendón, entrevistado en ‘Pitchline-Zine’

17/02/2014

Pitchline-Zine, revista dixital dedicada á música metal extrema, publicou estes días unha recensión de Reflejos del abismo —a colección de relatos de fantasía de Carlos Dopico ilustrados polo noso socio Luis Sendón—, precedida dunha entrevista cos seus autores.

Na entrevista, que pode lerse aquí, escritor e ilustrador falan, entre outros temas, da súa colaboración con novos relatos na revista Exhumed Movies Zine, e da previsión de novas entregas de recompilatorios de Reflejos del abismo.

Entrevista a Emma Ríos en ‘El País’

24/12/2013

O suplemento «Smoda» do diario El País publicou este domingo unha entrevista coa nosa socia Emma Ríos.

Baixo o título «Marvel paga bien, pero no es tu obra», a breve conversa xira en torno ao salto de Emma desde as franquías de Marvel á súa obra propia Pretty Deadly, con guións de Kelly Sue DeConnick.

Javi Montes, entrevistado en ‘Numerocero.es’

30/10/2013

A revista dixital Numerocero.es publicou onte o artigo «La trastienda: Coloristas de cómic», asinado por David. G. Natal, no que se recollen declaracións de tres autores españois que traballan nesta especialidade no ámbito internacional: José Villarrubia, Javier Rodríguez e o noso socio Javi Montes. O artigo busca reflectir a visión dos profesionais «desta disciplina indispensable» para o mundo da banda deseñada. Javi Montes, pola súa parte, publicou no seu blog o contido completo da entrevista que lle fixeron, para complementar o publicado no artigo.

Entrevista con Suso Cubeiro

29/10/2013

Nomeado socio de honra da AGPI o pasado sábado, Suso Cubeiro non só é un dos veteranos da ilustración en Galicia, senón que ten unha traxectoria multidisciplinar como poucos. Todo iso queda reflectido na entrevista realizada por Fernando Esclusa con ocasión da homenaxe, que agora reproducimos no Taboleiro da AGPI. O texto completo pode lerse aquí.

Na foto, a figura que lle foi entregada a Suso no transcurso do acto no Encontro Galego de Ilustración. Inspirada no logotipo da AGPI, está realizada por Laura Blanco.

Pinto & Chinto gañan o Premio Mingote

11/06/2013

O Premio Mingote, un dos galardóns de periodismo que outorga o diario Abc para destacar o traballo gráfico en prensa —humor gráfico, ilustración e fotografía—, recaeu este ano nunha viñeta publicada en La Voz de Galicia polo dúo Pinto & Chinto —pseudónimo artístico do noso socio David Pintor e mais Carlos López—. O premio coincide co vinte aniversario de colaboración continuada dos dous autores. Neste artigo de La Voz de Galicia poden encontrarse máis detalles sobre o recoñecemento, ademais da viñeta premiada. Nestoutra ligazón, unha entrevista que lles fixo o Abc aos gañadores.

O estudio Baobab, na revista ‘R’

11/06/2013

A revista que a compañía R distribúe entre os seus clientes cada dous meses dedica, no número correspondente a xuño, unha reportaxe ao estudio Baobab.

O estudio, nacido hai once anos, está conformado na actualidade por varios dos nosos socios (Dani Montero, Fernando Llorente, Juanjo Estrada, Santy Gutiérrez e Yago García Yaguete).

A reportaxe, publicada nas páxinas 18 e 19 da revista, pode descargarse en versión PDF nesta ligazón.