Este sábado, 18 de maio, o noso socio David Rubín estará ás 18:00 h no Museo Abc (Madrid) a participar nunha mesa redonda titulada  «Jóvenes autores: procesos de creación, estilos e influencias», xunto aos ilustradores Puño e Pepe Larraz, moderados por Álvaro Pons.

Tras ela participará na clase maestra «Una página de cómic directa»: creará unha banda deseñada dunha páxina nunha hora; o guión correrá a cargo dos asistentes á actividade.

Ambos os actos están enmarcados no programa da Semana del Dibujo y la Ilustración.

Gardado en noticieiro, charlas, cómic, socios, eventos | 0 comentarios

A partir de mañá poderá adquirirse nas librarías a nova obra do noso socio Fran Jaraba, a novela gráfica División Azul, que publica a alacantina Edicions de Ponent.

Ficción de ambientación histórica, esta banda deseñada está protagonizada por un mozo que se alista en 1941 na División Azul para tentar levar a cabo unha misión secreta do partido comunista.

Pode accederse a máis información e un par de páxinas do libro no blog da editorial.

Gardado en noticieiro, cómic, libros | 0 comentarios

A serie Castelao, que Inacio e Iván Suárez están a realizar en banda deseñada sobre a vida de Afonso Daniel Rodríguez Castelao, chega ao seu terceiro volume, titulado Máis alá! A nova entrega vén apadriñada novamente por Komic Librería e Demo Editorial, o proxecto do noso socio Manel Cráneo.

O libro estará nas librarías galegas o día 16 de maio, a coincidir coa semana das Letras Galegas, pero o día 15, ás 18:00 h, desenvolverase un acto de lanzamento na libraría Komic (rúa de San Pedro de Mezonzo 34, 15701 Santiago de Compostela), que contará coa presenza dos autores. Durante a actividade será sorteada dunha páxina orixinal da BD entre os compradores.

Gardado en noticieiro, cómic, presentacións, socios, libros | 0 comentarios

O noso socio Jacobo Fernández Serrano presenta estes días o seu novo libro de banda deseñada Marcopola 2: Os piratas da lúa —que en breve terá tamén edición en español, catalán e francés, da man do selo Mamut—, a través de talleres infantís de cómic que se desenvolverán nos distintos centros de El Corte Inglés en Galicia.

Así, hoxe, 14 de maio, a partir das 18:30 h, haberá un obradoiro de cómic no centro de El Corte Inglés de Santiago de Compostela; mañá, día 15, á mesma hora, un no de Vigo; e finalmente, o día 16, con idéntico horario, outro no da Coruña.

Gardado en noticieiro, obradoiros, cómic, socios, libros | 0 comentarios

O noso socio David Buceta, xunto con David Braña, estiveron a pasada fin de semana en Calahorra (A Rioxa) como convidados das primeiras xornadas dedicadas á banda deseñada nesa localidade: Calacómic. A iniciativa, que se desenvolveu entre o 30 de abril e o 4 de maio, contou con exposicións, talleres, conferencias e outras actividades, e convidados como Pedro Espinosa, Klaus, Jose Antonio Rubio ou David Daza.

David Buceta e David Braña presentaron o seu proxecto El Arca de las Historietas, revista de cómic que xa conta con 5 números publicados. A charla complementouse cunha exposición e con sesións de sinaturas e debuxos da revista.

Gardado en noticieiro, publicacións, cómic, presentacións, socios, eventos, exposicións | 0 comentarios

A novela gráfica Os días do cometa, do escritor e xornalista Manolo López Poy e o noso socio Miguel Fernández, preséntase esta fin de semana en tres lugares da xeografía galega, coa presenza dos seus autores.

Así, mañá, venres 3 de maio, o acto de lanzamento será na Libraría Paz (rúa da Peregrina 29, 36001 Pontevedra), as 18:30 h. O sábado, ás 12:30 h, na Libraría Totem (praza de S. Domingo 3, galerías, 27001 Lugo), e ás 21:30 h no Pub Cómic (rúa Rías Baixas 7, 27600 Sarria).

Actualización: o venres 10 de maio os autores estarán a presentar o libro tamén en Lalín. Pola mañá, ás 10:30 h, nunha charla no EIS Ramón María Aller, e pola tarde, ás 19:00 h, na Libraría Vagalume (rúa D, n.º 20, 36500 Lalín).

Gardado en noticieiro, cómic, presentacións, socios, libros | 0 comentarios

O especial que lle dedicou onte o diario El Mundo ao 75.º aniversario da creación do personaxe Superman inclúe un capítulo («Mi Superman») en que varios autores de cómic dan a súa opinión sobre esta icona cultural: os escollidos son Carlos Pacheco, Jesús Merino, Jan, Paco Roca, Miguel Gallardo e o noso socio David Rubín.

David comenta como trataría el o personaxe («O meu Superman loitaría por acabar coa pobreza e a fame, e esas cousas para as que de verdade faría falta un superheroe»), e as versións que os diversos autores lle foron dando ao longo da historia.

Gardado en noticieiro, entrevistas, cómic, socios | 0 comentarios

O noso socio Antonio Seijas asinará exemplares da súa obra Cartas de inverno —adaptación da obra homónima de Agustín Fernández Paz— na caseta da libraría Espacio Lector Nobel Ferrol, este sábado, día 20, ás 18:00 h, dentro das actividades da Feira do Libro de Ferrol, situada no Cantón de Molíns.

Gardado en noticieiro, cómic, presentacións, socios, libros, eventos | 0 comentarios

Á parte do seu traballo para diversas series do mercado norteamericano, a nosa socia Emma Ríos tamén segue a participar en diversos proxectos editoriais colectivos.

Despois de ver publicado en España a primeira entrega da serie Prophet, Remisión, no que se inclúe unha historia súa, aparece agora en Norma Editorial Tales from the end of the World (onde tamén colaboran os nosos socios David Rubín e José Domingo), e en Dibbuks o volume 9 preguntas (entre outros 33 autores, entre os que está José Domingo) que contan con páxinas da súa autoría.

Gardado en noticieiro, cómic, socios, libros | 0 comentarios

O Saló del Còmic de Barcelona, que chega este ano á súa trixésimo primeira edición, ten de novo unha importante presenza galega.

Así, o noso socio José Domingo, gañador do premio á mellor obra española no Salón do ano pasado, é o protagonista dunha das exposicións centrais, e David Rubín é un dos candidatos ao premio deste ano á mellor obra, por El héroe.

Ambos participan ademais na obra colectiva Tales from the end of the World, novidade esta semana, e asinarán exemplares das súas obras nos stands do Salón (os horarios poden encontrarse aquí); Rubín ademais o fará tamén nas Jornadas Comiqueras Fnac/SD, que se desenvolven paralelamente nestas datas en Barcelona.

A TVG, no seu programa ZigZag Diario, emitiu hai uns días unha entrevista con David Rubín e Miguelanxo Prado, dous dos candidatos ao premio á mellor obra no Salón deste ano. A entrevista pode verse aquí.

Gardado en noticieiro, cómic, socios, libros, eventos, exposicións, premios | 0 comentarios