AGPI - Asociación Galega de Profesionais da Ilustración

Fernando Llorente

Buscador de Ilustradores

Listado de ilustradores

Noticias

Clases de ilustración ‘online’ de Víctor Rivas

hai 2 días

Desde a web www.clasesdeilustracion.com, o noso socio Víctor Rivas ofrece unha «escola de ilustración 2.0», con clases permanentes en liña, titorías profesionais, clases maxistrais e talleres de ilustración e narración gráfica a través de sesións de Hangouts de Google+, o que permite levar a cabo videoconferencias, chats e intercambio de arquivos, e compartir a pantalla para ver ao instante o manexo dos programas por parte dun profesional.

As titorías e clases van dirixidas a grupos de non máis de seis persoas. Víctor Rivas ofrece apoio, seguimento, consultas e correccións a través de correo electrónico e redes sociais, con seguimento diario de preguntas e dúbidas desde o foro en Facebook. Calquera persoa interesada, independentemente do seu nivel na ilustración, pode participar, con prezos que van desde os 20 euros.

‘Episodios lunares’ chega en marzo ás librarías

hai 3 días

A obra Episodios lunares, publicada orixinalmente en francés polo noso socio Martín Romero en 2013, chegará nos próximos días ás librerías na súa versión española, en coedición entre Reino de Cordelia e Vidas de Papel.

O volume está composto por oito relatos gráficos en que, en palabras dos editores, «os recordos da infancia, os mitos adheridos aos relatos populares, chocan contra o mundo dos adultos nunha constante fábula». Neles, Martín «xoga co deseño e a cor para crear un mundo tan persoal como poético e, en ocasións, mesmo tenebroso».

Ademais da edición normal, porase en circulación unha edición especial de 200 exemplares que incluirán unha serigrafía realizada en exclusiva, asinada e numerada polo autor, e que pode reservarse xa desde a web.

Autobom, novo minifestival de autoedición

19/02/2015


Cartel a cargo de Bernal Prieto, con ilustración de José Domingo

Esta fin de semana ten lugar na Coruña o Autobom, minifestival de autoedición invernal, que é irmán o Autobán do pasado mes de agosto, e novamente conta coa colaboración da AGPI na súa organización.

Autobom desenvolverase ao longo do venres 20 e o sábado 21. Será un evento aberto dedicado á autoedición e ao cómic de autor, e incluirá unha serie de actividades relacionadas co tema. Busca ser punto de encontro para os creadores que se autoeditan, e por iso todas as actividades teñen un enfoque aberto e colaborativo. O lugar de realización será The Room (rúa Afonso VII, 15, 15005 A Coruña).

O programa comeza mañá, venres 20, de 18:00 a 21:00 h, «Autolab»: actividades creativas coa axuda dos impulsores do Lab·Ou, con idea de montar ao largo do envento un fanzine (Autozine), cuxo contido proveña do cómic común que se faga, además das colaboracións recibidas vía e-mail. De 21:30 a 23:00 h, Concerto ilustrado, con música de Mglon e debuxos de Roque Romero.

O sábado 21 haberá, durante todo o día, un mercado de fanzines nunha mesa común. De 12:30 a 13:30 h, desenvolverase un curso de maquetación de fanzines, a cargo de Bernal Prieto. Entre 13:30 e 15:00 h, Sesión Vermú, con música, bebida e petiscos. De 17:00 a 18:30 h, sesión de estampación y cosido a cargo de Paula Fraile. Finalmente, de 18:30 a 20:00 h, mesa redonda de autoedición, un debate aberto cos asistentes.

Entrevista a Jacobo Fernández en ‘Biosbardia’

13/02/2015

A revista dixital sobre literatura Biosbardia publicou esta semana unha ampla entrevista ao noso socio Jacobo Fernández Serrano. Baixo o título «O tempo verbal das miñas obras é o pretérito xogativo», a entrevista fai un percorrido polas inquedanzas creativas de Jacobo como ilustrador, autor de BD e escritor.

Charla de Max na Coruña

11/02/2015

Mañá, xoves 12 de febreiro, ás 18:30 h no salón de actos da UNED da Coruña (rúa Pepín Rivero 3, 15011 A Coruña) terá lugar unha nova sesión do ciclo «A creación literaria e os seus autores: XI Encontros con escritores», que contará nesta ocasión coa presenza do ilustrador e autor de cómic Francesc Capdevila, Max.

Premio Nacional de Ilustración en 1997 e Premio Nacional de Cómic en 2007, as súas últimas obras ata agora son Vapor, Paseo astral e Conversación de sombras en la villa de los papiros.

A entrada e libre e gratuíta, e ademais a sesión poderá seguirse por videoconferencia neste enderezo.

Actividades nas bibliotecas o Día da Ilustración

29/01/2015


Cartel oficial do Día da Ilustración 2015, por Miguelanxo Prado

Á parte do acto central do Día da Ilustración —a mesa redonda organizada coa AGPI, mañá, venres 30, ás 19:00 h co título «As mil caras da ilustración: novos campos e soportes para o traballo ilustrado» (na Biblioteca Pública Miguel González Garcés, rúa Miguel González Garcés, 15008 A Coruña)—, as bibliotecas nodais galegas van acoller un bo número de actividades relacionadas co mundo da ilustración, moitas delas en colaboración con socios da AGPI.

Así, na propia biblioteca Miguel González Garcés, este sábado Xosé Tomás desenvolve o obradoiro creativo de banda deseñada «Coñécete a través dos cadriños» (para nenos de 6 a 12 anos).

Noemí López impartirá un taller de ilustración na Biblioteca Pública de Lugo (avda. Ramón Ferreiro, s/n, 27002 Lugo) mañá a partir das 18:00 h. Está dirixido a nenos e nenas de entre 4 e 12 anos.

A Biblioteca Pública Juan Compañel (rúa Joaquín Yáñez, 6 36202 Vigo) acolle, desde mañá ata o 2 de febreiro, a mostra «Marcopola, a illa remeira», de Jaboco Fernández, que ademais ofrecerá o sábado, ás 12:30, unha charla aberta a todo o público interesado. No mesmo lugar, a partir das 12:00, Noemí López será tamén a encargada de dirixir un taller de ilustración dirixido a cativos de máis de 3 anos.

A Biblioteca Pública de Ourense (rúa Concello, 11, 32003 Ourense) tamén programou para o sábado ás 11:30 un obradoiro de cómic, a cargo de Yago García.

Finalmente, na Biblioteca Pública Ánxel Casal (avenida de Xoán XXIII, s/n, 15704 Santiago de Compostela) permanece ata mañá unha exposición bibliográfica dedicada aos ilustradores galegos.

Charla de Manel Cráneo en Bilbao

27/11/2014

O noso socio Manel Cráneo está esta tarde en Bilbao a participar nas xornadas de cómic en éuscaro Parrapean — Komiki Egunak/Días de Cómic, que teñen como unha das súas liñas de acción a titulada «Arte e oficio da BD en linguas minorizadas: Occitania, Galicia e País Vasco».

Dentro desa liña, a primeira das charlas será a de Manel, baixo o título «Banda Deseñada: cómic con denominación de origen. Crear, producir y financiar cómic en Galicia», na que estará presentado polo ilustrador Ion Iñaki Artetxe. Será a partir das 19:30 h, no centro Begoñako Udaltegia.

Os vídeos do Autobán, xa na rede

19/11/2014

Xa está dispoñible o videorresumo das actividades desenvolvidas o pasado mes de agosto no minifestival de autoedición Autobán, organizado pola AGPI na Coruña.

O resumo serve de introdución para os vídeos completos da charla «Viñetas de vida», da mesa redonda «Outros roles de xénero no cómic» e da titulada «Modelos e saídas da autoedición».

Todos eles foron preparados pola nosa socia María Álvarez Hortas, e o vídeo de resumo conta con banda sonora preparada especialmente para a ocasión por Roberto Casteleiro (Koroiev).

Outro dos eventos que formaron parte do Autobán, o Combate de Debuxantes, xa fora recollido en vídeo hai unhas semanas por Iago González, de Enimaxes.com.

Presentación das novas obras de David Rubín
na Coruña

14/11/2014

Hoxe, venres 14, a partir das 19:00 h, o noso socio David Rubín presenta as súas últimas novidades editoriais: a edición española do primeiro volume de The Rise of Aurora West, titulada El momento de Aurora West — Vol. 1, e Las tripas del Héroe 2 (a edición das páxinas a lapis do segundo tomo de El Héroe).

Será na libraría Alita Comics Orzán (rúa Orzán 94, 15003 A Coruña), e dará comezo a unha xira de presentacións por toda a xeografía española, que será anunciada en breve.

Premio Nacional do Cómic para
Juan Díaz Canales e Juanjo Guarnido

12/11/2014

Onte dábase a coñecer o Premio Nacional do Cómic correspondente a 2014. O galardón, que outorga cada ano o Ministerio de Cultura e que distingue a mellor obra de banda deseñada publicada en calquera das linguas do Estado durante o ano 2013, recaeu nesta edición nos autores Juan Díaz Canales e Juanjo Guarnido, pola súa obra Amarillo, pertencente á serie «Blacksad». O xurado elixiu esta obra «por ser unha BD de calidade sen fronteiras, cargada de referencias culturais e cunha óptima execución», e considerou que a escolla constitúe «un recoñecemento ao cómic para o gran público».

Juan Díaz Canales (Madrid, 1972) estudou Belas Artes na Universidade Complutense de Madrid. En 1996 fundou, xunto con otros tres artistas, a compañía Tridente Animation. Ten traballado con compañías europeas e estadounidenses, escribindo argumentos e guións para cómics e filmes de animación, así como layouts e storyboards para series e longametraxes de animación.

Juanjo Guarnido
(Salobreña, Granada, 1967) comezou a traballar nun estudio madrileño de animación nos anos 90 e realizou layouts e storyboards para diversos proxectos. En 1993 trasladouse a vivir a Francia, onde pasou a traballar como animador en filmes como Hércules, Tarzán e Atlantis. Posteriormente tamén traballou na coprodución hispano-francesa Nocturna.

Canales e Guarnido realizan xuntos desde o ano 2000 a serie «Blacksad», da que levan publicados cinco títulos, e que xa ten sido premiada en numerosas ocasións (Salón do Cómic de Barcelona en 2001 e 2006, Harvey Award en 2005, Festival de Angoulême en 2005, Expocómic de Madrid en 2010, dous premios Eisner en 2013).

O xurado desta edición estivo composto por Alfonso Zapico, autor galardoado en 2012; Miguelanxo Prado, galardoado en 2013; Olga Carmona, designada pola Asociación de Autores de Cómic de España (AACE); Carla Berrocal, pola Federación de Asociaciones de Ilustradores Profesionales (FADIP) —á que pertence a AGPI; Jaime Martín, pola CEGAL; Pablo Herreros, pola FAPE; Asunción Bernárdez, polo Instituto de Investigaciones Feministas da Universidade Complutense de Madrid; e Manuel Barrero, polo ministro de Educación, Cultura e Deporte.