Coincidindo
coa presentación oficial do VIII Festival de
Banda Deseñada da Rexión de Bruxelas, e dentro das actividades Galicia,
tempo de BD, inaugurouse o día 1 na capital
belga a nosa mostra 10 anos de BD galega, unha
retrospectiva dos grandes traballos da banda deseñada galega
dos últimos anos,que xa estivera en España, Portugal e Cuba. Ao acto, asistiron autoridades
belgas e medios de comunicación especializados, así como
representantes da Dirección Xeral de
Promoción e Difusión Cultura da Cultura da Consellería de Cultura
e Turismo, promotora da exposición, e a Fundación Galicia Europa,
entidade que tivo a iniciativa de trasladar a mostra a Bruxelas.
O
obxectivo desta iniciativa é facer promoción entre o público e os
editores belgas da obra dos ilustradores galegos, especialmente
daqueles que teñen publicado en francés. Durante
a presentación, realizouse un pequeno percorrido pola historia da
banda deseñada galega, salientando especialmente o recoñecemento
acadado na última década, cando Galicia se converteu nun dos
principais focos do cómic a nivel español.
Composta
por láminas de 42 autores, 10 anos de BD galega é, xunto á dedicada ao debuxante Raoul Cauvin, unha das dúas exposicións temáticas que
se exhibirán entre o 9 e o 11 de outubro durante o festival de Bruxelas, un dos máis
importantes do poderoso mercado francófono
e que nesta edición coincide coa celebración en Bélxica do Ano da
Banda Deseñada.
Ademais
dos milleiros de visitantes, autores e editores que cada ano enchen
as salas do
festival, a mostra abrirase a visitas guiadas para escolares,
estudantes das escolas de cómic e público en xeral na Maison
Pelgrims de Bruxelas, onde permanecerá ata o día 8 de
outubro. Posteriormente, trasladarase ao recinto do festival onde se
poderá contemplar xunto aos stands dos ilustradores
internacionais seleccionados pola organización.
Podedes ver imaxes do evento no flickr de AGPI.
Gardado en agpi, eventos, exposicións |
0 comentarios
