AGPI

Presentación de ‘Sinónimos de Lucro’ e ‘El Arca de las Historietas’

webmaster@agpi.es — Fri, 03 Feb 2012 11:19:15 +0100

As revistas Sinónimos de Lucro e El Arca de las Historietas presentarán de forma conxunta os seus últimos números na libraría Banda Deseñada (rúa Cataluña 27, 36206 Vigo), mañá, sábado 4 de febreiro, ás 18:30 h.

O número 4 de Sinónimos de Lucro contén, ademais das series fixas de cada número, unha introdución a cargo de Víctor Santos e unha entrevista a Julián Hernández e Óscar Avendaño, de Siniestro Total.

Pola súa parte, o número 2 de El Arca de las Historietas inclúe traballos de diferentes autores con historias autoconclusivas de diferentes temáticas ao longo de 68 páxinas.

Os asistentes á presentación poderá levar o último número de Sinónimos de Lucro cunha portada exclusiva, diferente á distribuída comercialmente.

Importante presenza galega nos Premios Entrecomics 2011

webmaster@agpi.es — Wed, 01 Feb 2012 12:17:42 +0100

A web especializada en BD Entrecomics publicou hoxe a lista dos seus premios anuais, que se veñen desenvolvendo desde 2009 con crecente participación e interese. Os premios de Entrecomics son concedidos por elección popular, e este ano foron 292 os participantes na votación.

Na categoría «Mellor cómic nacional» o vencedor foi este ano El héroe – Libro uno, de David Rubín; o segundo posto ocúpao Aventuras de un oficinista japonés, de José Domingo —que ademais tamén está no terceiro posto na categoría de «Cómic mellor editado»—, e o noveno posto, Las fabulosas crónicas del Ratón Taciturno, de Martín Romero.

A categoría «Mellor cómic nacional publicado en catalán, éuscaro ou galego», o primeiro posto foi para A man do diaño, de Brais Rodríguez, e o terceiro para Lois Pereiro. Breve encontro, de Jacobo Fernández Serrano.

Finalmente, o terceiro posto da categoría «Mellor humorista gráfico en prensa» é tamén para un socio da AGPI: trátase de Forges, que xa foi premiado na mesma categoría en 2009.

Exposición de Dani Montero en Arteixo

webmaster@agpi.es — Wed, 01 Feb 2012 11:19:16 +0100

Ata o día 12 de febreiro pódese visitar en Arteixo a exposición de pranchas do álbum Sen mirar atrás, do noso socio Dani Montero. A novela gráfica foi vencedora do V Premio de Banda Deseñada Castelao, e está dispoñible en galego e castelán (editada por Demo Editorial) e mais en alemán (por Edition52).

A mostra está na sala de exposicións do Centro Cívico Cultural de Arteixo (Paseo Fluvial s/n, 15142 Arteixo) en horario de 10:30 a 14:00 e de 16:30 a 20:00 h de luns a venres, e de 10:30 a 14:00 h os sábados.

Martín Romero presenta ‘Las fabulosas crónicas del Ratón Taciturno’

webmaster@agpi.es — Thu, 26 Jan 2012 10:30:10 +0100

A primeira novela gráfica do noso socio Martín Romero, resultado dunha bolsa outorgada por AlhóndigaBilbao e desenvolvida na Maison des Auteurs de Angoulême, leva xa unhas semanas nas tendas e será presentada agora publicamente en dúas librarías galegas.

Deste xeito, os primeiros actos de lanzamento de Las fabulosas crónicas del Ratón Taciturno terán lugar, por unha parte, o próximo venres 3 de febreiro, ás 18:00, na libraría Kómic (rúa San Pedro de Mezonzo 34, 15701 Santiago de Compostela), e por outra o sábado 4 de febreiro, ás 20:00, na libraría Alita Comics (rúa do Orzán 110 B, 15003 A Coruña). Cada presentación irá seguida dunha sesión de sinaturas para o público presente.

Actualización (2/2/12): Debido a un imprevisto, a presentación da Coruña en Alita quedou aprazada para o sábado 11 de febreiro, á mesma hora.

O ‘Sketchbook’ de Guitián, xa nas librarías

webmaster@agpi.es — Tue, 24 Jan 2012 17:04:06 +0100

Un dos dous derradeiros proxectos do Colectivo Polaqia —que se despedía como tal coa fin do ano— é, xunto con 3×1, de Jano e Ricardo Mena, o número 6 da serie Sketchbook, que nesta ocasión é de bosquexos e ideas gráficas de Alberto Guitián e leva por título Sólo tinta. A publicación xa pode ser adquirida en librarías especializadas

Hoxe, ademais, coñeceuse que o filme Chico & Rita, en que Guitián participou facendo fondos e accesorios, está oficialmente nomeado ao Oscar ao mellor filme de animación.

Pilar Marcó Padín, Premio Pura e Dora Vázquez de Ilustración

webmaster@agpi.es — Tue, 24 Jan 2012 11:44:23 +0100

A coruñesa residente en Barcelona Pilar Marcó Padín foi escollida como gañadora da novena edición do Premio Pura e Dora Vázquez de Ilustración, convocado pola Deputación de Ourense e dotado con 3000 euros e a publicación da obra. O orixinal sobre o que se debían presentar as ilustracións é obra de Celia Díaz Núñez, gañadora da primeira fase do certame, sobre textos literarios. O xurado considerou que as ilustracións «conforman un traballo harmónico, contemporáneo e cun grande atractivo plástico».

Presenza galega no programa oficial do Festival de Angoulême

webmaster@agpi.es — Mon, 23 Jan 2012 17:02:54 +0100

Segundo informa hoxe CulturaGalega.org, a exposición Tebeos – Les bandes dessinees espagnoles, preparada polo Ministerio de Cultura co gallo de ser España país convidado este ano no Festival International de la Bande Dessinée d’Angoulême (Francia) —o festival máis importante de Europa dedicado aos cómics—, contará coa presenza de varios galegos representados.

A mostra, coordinada polo crítico Álvaro Pons, repasa a historia, o presente e mais o futuro da BD española, e nela están, entre outros, Miguelanxo Prado, David Rubín, Jacobo Fernández Serrano e José Domingo. Este último, ademais, estará no festival asinando exemplares da súa obra Aventuras de un oficinista japonés, na súa edición francesa; Rubín, pola súa parte, asinará exemplares das súas obras publicadas alí por Rackham Éditions.

Dáse a coñecer o programa do congreso «Ilustrando a diversidade»

webmaster@agpi.es — Fri, 20 Jan 2012 12:45:09 +0100

O congreso internacional «Ilustrando a diversidade» terá lugar no Auditorio da Facultade de Ciencias da Comunicación de Santiago de Compostela (avenida de Castelao, s/n, 15782 Santiago de Compostela) entre o 20 e o 23 de febreiro. O congreso enmárcase no proxecto CampUSCulturae e reunirá ilustradores de distintos países do mundo, expertos en arte e edición e profesionais da animación e da promoción da lectura.

Entre outros moitos, haberá relatorios de Carme Solé Vendrell, Mark Taeger, Elena Odriozola, David Pintor ou Miguel Ángel Giner Bou; a AGPI participará, representada polo seu presidente, Santy Gutiérrez, nunha mesa redonda acerca da ilustración en distintos soportes.

A matrícula, para asistentes e para autores de comunicacións, é aberta e gratuíta, e ten que realizarse antes do día 10 de febreiro. Poden presentarse comunicacións, vídeo-animacións e proxectos de ilustración, aínda que todos os traballos deberán tratar contidos que relacionen a ilustración, o libro ilustrado ou a animación coa diversidade cultural, o multilingüismo, a interculturalidade ou as barreiras que dificultan a convivencia e a aceptación da diferenza.

Paralelamente ao congreso, inaugurarase a exposición IlustraMundos no Palacio de Fonseca (rúa de Fonseca 3, 15782 Santiago de Compostela), onde poderá visitarse desde o 20 de febreiro ata o 20 de abril. Na exposición haberá obra dos galegos Antonio Seijas e David Pintor, así como da lituana afincada en Galicia Kristina Sabaite —todos eles, socios da AGPI— e tamén doutros autores provenientes doutros lugares, como a arxentina Mónica Weiss, a catalá Carme Solé Vendrell, o suízo Mark Taeger, a polaca Joanna Domanska, o holandés Machiel Braaksma, a vasca Elena Odriozola ou o sudafricano Piet Grobler.

Actualización: pode accederse ao programa provisorio do congreso nesta ligazón.

Exposición ‘40 Dots. 40 Artistas’

webmaster@agpi.es — Thu, 19 Jan 2012 11:28:33 +0100

Coincidindo coa publicación do número 40 da revista Dot, os seus editores reúnen 40 artistas galegos (ou relacionados directamente con Galicia) cuxas obras foron publicadas na revista. Segundo os organizadores, os autores selccionados «mostran nesta exposición unha realidade artística galega á marxe, ou non, do circuíto estándar de galerías».

Na lista de artistas está un bo número de ilustradores; entre outros, Diego Blanco, Federico Fernández, Pirusca, Bernal Prieto, David Rubín ou Óscar Villán.

A exposición poderá verse só catro días: 20, 21, 27 e 28 de xaneiro, en El Halcón Milenario (rúa Cervantes 18-1.º dereita, 36201 Vigo). Cada un dos días haberá unha actividade especial: a inauguración, ás 20:00 de mañá, venres 20; o sábado 21, a gravación dunha «Sesión Ligera» con The Cobras; o venres 27, actuación do grupo de experimentación visual e sonora Hedonistas; e o sábado 28, concerto acústico da banda Ignorantes.

Xosé Tomás, ilustrador do ano para ‘Fervenzas Literarias’

webmaster@agpi.es — Thu, 19 Jan 2012 10:28:39 +0100

Os premios que anualmente outorga a web Fervenzas Literarias, a partir de enquisas realizadas entre case 500 lectores, destacan como Mellor ilustrador de 2011 a Xosé Tomás. Os seguintes máis votados nesta edición foron, por esta orde, Jacobo Fernández Serrano, Andrés Meixide, David Pintor e Noemí López, todos eles socios da AGPI.

Outras categorías con gran presenza de ilustradores e ilustradoras (tanto nesa soa faceta como na de autores de texto e ilustracións) foron o de Mellor libro infantil, Mellor libro xuvenil, Mellor portada de literatura infantil e xuvenil e Mellor libro de LIX traducido.